پاپلی بومبه وپر کشمبه پر
فدایی بومبه وچرخمبه ته سر
اگر بپرسینه منه نشونی
گمبه هسّمه جان ماره نوكر
،،،،
سردِ شوي زمستون با نوازش
گره ره تو داهی خوندسی خونش
نختی جان مار تا صبح صادق
وچه خو بوردِبو ته دل بي يه خش
،،،،،
مه ديده كمسو بَيّه كجه بوردي
روزِروشن شو بيّه كجه بوردي
خاسّي بوري وِسّه مره بَوِري
دل تسّه كهو بيّه كجه بوردي
،،
جانِ مار تِه منِه دله قراري
مه باغي و گلی ولاله زاری
هر کجه صحبت از مهرو وفاهه
خدا دونده ته منه افتخاری
,,
مره هداهی شیر من ته بلاره
موسه بهی پیر من ته بلاره
ته خسته چش نماشون دهی یه راه
اگه هاکردبوم دیر من ته بلاره


جان مار ته بک وبوی بلاره
ته سره اِسبِه گیسوی بلاره
مره گت هاکردی با رنج وزحمت
من خشکه دشت وته اوی بلاره
,,,,
صباحی تا نماشته صحرا دهی
اتی دشت واتی هم لتکا دهی
نماشون که اِموهي تن خسته
دنبا ل اسب و گو و سیکا دهی
,,,,
تهِ دست ر تِلِمِ چوزخم هاكرده
ته لينگ ره دشته زلو زخم هاکرده
از بس بوردی روخنه او دگیشتی
ته سر ره مرسه افتو زخم هاکرده
,,,,
جان مار ته واری پیدا نبونه
دلی مثل ته دل شیدا نبونه
اگر صد حج بجا بیاره فرزند
رضا نووی خدا رضا نبونه

شاعر قاسم جناتیا ن قادیکلایی ِ