#مادر
دکلمه برای مادر // به زبان مازندرانی

🔸🔸🔸🔹🔹🔹🔶🔶🔶🔷🔷🔷⚫️🔴🔵⬛️

لب ره وا کمبه به نومه خالق هفت آسمون
تا مدد هاکنه. بووم مارِسّه با دل خون

مه پرستاری هاکرده منّتی نشته مه سر
من قد بکشیمه به مثل سرو و. مار بیّه کمون

سختی و رنج و بلا و داشتی ناشتی بدیعه
اینا سوغاتی بیعه بدیعه از چرخ زمون

ماره چشِ دور گره سر نخته تا صواحی
اتا دس گره ره تو دا اتا دس چرخ جهون

تا که راه دکفم مه دسّه بهیته شو و روز
اولین معلمِ من بیعه یاد هدا زبون

بخردی نخردی هاکرده و کم نِشته مِسّه
کف دس پینه دوِسّه داشته از سختی نشون

چشه روزگار ندیعه ونه جور محرم و یار
ونه خوبیها عیانه لا بِدٰا نی هه نهون

انده آبرو دارنه خدای پیش مه جان مار
ونه لینگ بن دره باغ بهشتی بیگمون

رفق بی کلکه حاشا که نارو نزنده
ونه واری نبونه پیدا در این دور زمون

آه خدا چنده خجیرو خارکِ مه جان مار
همنشین هاکن وره ته با زهرای نوجوون

سرِ این قصّه درازه. من قلندره وای
کشکول ره دس گیرمه دور زمبه تمومه خیابون

چلچلا بیّه بورده جان ننا سوی سفر
مره هاکرده. نخار مه زخمِ دل نارنه ریمون

مره که یاد نبونه جانِ ماره سَرِ بلا
تا قیامت توسّه نالمبه سونه عاشقون

للهٔ جه غم بارنه ته عزا سوزنه تک
هیرا هیرا بزنم همن همن به مازرون

دیگه غرصه خوار ندارمه آه خدا مره بکوش
جان مار بوردی (صفایِ ) قد ره هاکردی کمون

شاعر حاج قاسم جناتیان قادیکلایی

لابدا نیعه =استتار نشده / مخفی نیست