اشعار

🌹🌹🌹➖➖🌷🌷➖➖🌸🌸🌸➖➖🌺🌺🌺➖➖⬛️

روز پی یر بمو ندارمه قرار / من شه بابای قربون
دسّه گل بعیرم من بورم مزار/

هنیشم شه پی یره قوره کنار/
تبریک بووم باباره ونه (سرِ)مزار//

سیزده رجب و مولا بموعه/
خبر از مه جان بابا نموعه/

مره یاد بموعه پارسال دیدار /
بوردمه پابوس پی یر و شه مار/

کادو هدامه شه جان باباره/
بوسه هدامه دسّ با صفاره/

خش هدامه شه بابای سوآل ره/
بپرسیمه اون روز بابای حال ره /

بوته جان پسر مه افتخاری /
اگر بمردمه مه یادگاری /

بوته پسر ممنون هاکردی مه یاد/
خشحال هاکردی مره خله زیاد /

پسر دعا کمبه تره شو و روز /
ترقی هاکنی هر روز و هر روز /

بته پسر ته مولا حیدر هسّه /
دنیا و محشر اَمه سرور هسّه/

علی واری بواش ای جان ریکا/
نکن جور و ستم هرگز به دنیا /

علی ظلم ِ به این و اون نکرده /
علی حق الناس ره دکّل نخرده /

حق و ناحق نکن ونه هادی پس /
اون روز هیچ کس نونه تره فریاد رس /

تش کلو بشته شه براره دس/
حکومت دنیاجه نهیعه مس /

بته پسر اینجور بواش به دنیا /
اگر خوانی راضی بوئم تنه جا /

مه پر بورده پر هایته سوی سفر /
موسّه بمونسّه دیدهٔ تر /

بووم شه پی یر و تسّه بمیرم /
مه کوه کوتر و تسّه بمیرم /

صفا زنده زار و شه بابای دور /
بهیمه تینار و شه بابای دور /

شاعر قاسم جناتیان قادیکلایی