داغ خواهر شعر مازندرانی
➖➖➖➖➖➖➖➖➖➖➖➖➖✔️✔️✔️🌹
مه تک وانبونه ته زار بخونم
من از داغ گل بی خار بخونم
گلی ره غم بیته صدا نَدِنِه
اسری بیته مه چش ره راه ندِنِه
کی ره بووم امه دل پاره بیّه
کی ره بووم ته شی بیچاره بیّه
کی ره بووم خاخر سختی بدیعه
کی ره بووم چندون خشی ندیعه
همه دوندنه چنده مهربون بی
غرصه خواره مردی و شه وچون بی
همه دوندنّه ماره با وفا بی
زن مؤمن و پاک و با حیاء بی
همه دوندنّه چنده غرصه خوار بی
ته غمخواره شنه دتا برار بی
دل خش بیمی ته کار روبراه بیّه
اتی خشی توسّه پیدا بیّه
ته بوردی کربلا الحمدلله
ته وچون جابجا الحمدلله
بشتوسّمه آگاه بهیعه آخر
دلداری دا مردی ره جان خاخر
ته دل خاسّه شه نوه ره بوینی
وره کادو هادی و خش دچینی
ته دل خاسه برارزای عروسی
اسپند دود هاکنی با دیده بوسی
اجل امه دسّه گل ره بورده
خبر بموعه که خاخر بمرده
خبر بمو پیمونه پر بهیعه
مه خاخر عازمه سفر بهیعه
مسلمانون خاخر پیدا نبونه
هرچی زار زمبه که دل وانبونه
اتی شه دل ره بوریم کربلا
بخونیم روضهٔ زینب و مولا
بخونیم زینبِ سرِ بلاره
اتی بوویم روضهٔ قتله گاه ره
سرو سینه زوئه بورده قتله گاه
کجه دری حسین مه ماره ریکا
هرچی اشمبه تن که سر ندارنه
زینب نشونهٔ دیگر ندارنه
مه ماره یادگار تسّه بمیرم
دنه بوئم تسّه عزا بعیرم
(صفا )ته هم بعو ای جان خاخر
بمیرم نوینم هاکردی سفر
شاعر قاسم جناتیان قادیکلایی
