اشعار

ای غریب الغربا امه جان بووه ته فدا /اشک چش راه دکته خام بورم از کوی شما
دره شومبه آقاجان مه دل بمونسّه ته پیش/ته زیارتِ دواره ره من خامبه از خدا
الوداع امام رضا/جان بهووه ته فدا

➖➖➖➖➖➖➖✔️
آقا ایوون طلا مثل بهشته موندنه/ خادما سازّه به دس توسه روضه خوندنه
اتا دخیل وندنه پنجره فولاد کنار/هرکسی اتا زبون توسه روضه خوندنه

الوداع امام رضا/جان بهووه ته فدا
➖➖➖➖➖➖➖✔️
وقتی که اینجه بمومی اما از مازندرون / سینه بزّومی حرم امه دل بیه غرقه خون
یاد اون مصیبتهایی که بکشی از عدو/تا ابد اسریِ چش بشندی بونه بی امون

الوداع امام رضا/جان بهووه ته فدا
➖➖➖➖➖➖➖✔️

نتومبی دل بَکنِیم بوریم از اینجه شه دیار/ترسمبی که این سفر بوئه امه آخره کار
اگه عز رائیل امون نده عمر بواشه تموم/ دم مردن آقاجون تشریف بیار امه کنار

الوداع امام رضا/جان بهووه ته فدا

➖➖➖➖➖➖➖➖✔️
شه بفرمائی سه جا به دادِ امت رسنی/ حاشا از ته که شه شیعه وسّه کاری نکنی
دم مرگ و دل قَوْرو موقع حساب کتاب /قول هدائی این سه جا ته امه فریاد رسنی

الوداع امام رضا/جان بهووه ته فدا

شاعر قاسم جناتیان قادیکلائی
تقدیم به برادرم برزگر نژاد