اشعار

من از این گلزار نشونه دارمه
الهی مار بمردبو
من از داغ شه جوون ناله دارمه
الهی,,,
من داغ نوگل نو رسته دارمه
الهی,,,
چند روزه ونه داغ شه سینه دارمه
الهی,,,
الهی مار بمردبو ,,داغ پسر ندیبو
مگر ته داغ مره بونه فراموش
الهی,,,
چند وقته ته صدا ننه منه گوش,,الهی مار بمردبو
مثل سیر وسرکه مه دل زنده جوش,,,الهی,,,,
بدیمه جوون نعش ره سره دوش,,الهی,,
الهی مار بمردبو ,,داغ پسر ندیبو
پنجشنبه نماشون ته قبرپلی
الهی,,,,
خرما بدست نیشتمبه برمه گلی,,الهی,,,
قبر سر شندمبه چشه جه اصری,,الهی,,,
ته که بوردی بورده منه دل خشی,,الهی,,
الهی مار بمردبو ,,داغ پسر ندیبو
مره یاد انه وا ته گره کنار
الهی,,,
زمستون شو من نیشبیمه بیدار,,الهی,,,
تره خو کردمه مه دل قرار
الهی,,,
گتمه بونی شه ماره یادگار
الهی,,,
الهی مار بمردبو,,داغ پسر ندیبو
شه دل گتمه من ای جان ریکا
الهی,,,
سره پیری بونی مه دسته عصا
الهی ,,,
کی گته جوون مرگ شونی زدنیا,,الهی,,
قبرستونه دله بونه تنه جا
الهی ,,
الهی مار بمردبو,,داغ پسر ندیبو
آرزو داشتمه من با دل شاد
الهی,,,
تره شه دسته جه بسازم داماد
الهی,,,
اجل مه آرزو ره هدا برباد
الهی,,,
زیر گل بورده مه گل شمشاد
الهی ,,,
الهی مار بمردبو,,داغ پسر ندیبو

از حقیر
قاسم جناتیان قادیکلایی