الهی مار نهیبوم مار نهیبوم
داغ جوون کیجا دچار نهیبوم
خوِر بموعه که ای پیر نالون
برو برو بمرده تنه جوون
خاک عزا فلک دکرده مه سر
گل وغنچه هردِ بهینه پر پر
دتر بمرده وآرزو به دل
ونه دل ارمون وبورده زیر گل
ارزو داشته و مه جانه کیجا
گره سر هنیشه بخونه لا لا
لالا لالا دتر ته تن نخاره
لا لا. لا لا ته ارمونه بلاره
اتا دس کشکول واتا دس عصا
درویش جور دتر صحرا زمبه پا
گمبه داغ جوون مه دل ره بوته
فلک ته دل چه موسه نسوته
اسا من کوتر کلّی بهیمه
پیر بهیمه ته داغ ره تا بدیمه
مره خنده نزنین ای رفیقون
خدا دونده سخت هسه داغ جوون
ننا شه کیجا ننا بمیره
مه دل سراوشته و ا ننا بمیره
دتر ته ارمون وننا بمیره
ته جا قورستون وننا بمیره

شاعر قاسم جناتیان قادیکلایی