پند //مازندرانی

🌹🌹➖➖🌹🌹➖➖🌷🌷➖➖🌺🌺➖➖🌸🌸

رفق دنیاره بی وفا بدیمه
گلی بیخار در این دنیا ندیمه

هرکی ره مار بزا بیارده دنیا
آخر بمرده بورده تاریک جا

شراب زندگی ره هاکنی نوش
آخر ونه بوری چار نفره دوش

دنیای بی وفا ره دل نوندین
این بی شرم و حیاره دل نوندین

اسا که اتّا روز ونه بمردن
ارزش نارنه دنیاسه غم بخردن

اگر هر وقت خانی بهووی مغرور
یا اینکه خانی بووی از خدا دور

اتی هارش قورستون میون ره
هارش.قوره میون سال و جوون ره

ته جا گپ زنده. که ای مرد باهوش
نکن هیچ وقت خدا ره ته فراموش

اگر شاه یا گدا باشی به دنیا
تاریکِ خنه آخر بونه ته جا

انده حرص و طمع برای چیعه
زر و سیم هیچ کس همراه نشیعه

دِ روز زندگی همت هاکنیم
خدا جه شکر از نعمت هاکنیم

رفق دست ره بهیر راس بواشه
شاید فردا ته بالِ ماس بواشه

برار بواشیم و هم یار و غمخوار
همسایه و رفق ره نکن آزار

ساده بووم برار عالم هستی
امه کار نهووه مرده پرستی

بمرده روز برمه فایده نارنه
پشیمونی اون روز چاره نارنه

(صفا) مردانه وار دواش به دنیا
خاره نوم بل شه وسه مرد دونا

شاعر قاسم جناتیان قادیکلایی
@shafabat