شعر عزای مادر // مازندرانی
🌷🌷🌷🌷🌷🌷🌹🌹🌹🌹🌹🌺🌺🌺🌺
ته مه ماهِ مونا بی کجه بوردی /ته مه دردِ دوابی کجه بوردی/
شه ماره دور
مه دل پاره بیّه تاریک خنه/ مه مظلومه ننا بی کجه بوردی/
شه ماره دور
آی جان ننا / جان جانِ ننا خدا دونده بی ته بهیمه تنها / شه ماره دور
➖➖➖➖➖➖➖➖➖✔️✔️✔️✔️
کعو دل ره توسّه پاره کمبه / تاریک خنه تسّه زاره کمبه
ته بلاره
بنفشه جار نشومبه تا دگردی / خد ره مجنون جور آواره کمبه
ته بلاره
ای دل قرار / آی مه جان مار
خدا دونده مه دل نعیرنه قرار / مه جان مار
➖➖➖➖➖➖➖➖✔️✔️✔️✔️✔️
از دست روزگار اسیر بعیمه / سن وسال نارمبه من پیر بعیمه
مره داغ جانِ مار پیر هاکرده / ته داغ هسه که من دل گیر بعیمه
خنه مار دنیعه تاریک شوعه / ته دلِ گوشه ونسّه کعوعه
مثل ابر بهار بونه تنه چش / روز و شو ندارنه دائم سیوعه
من شه جان ماره قربون بواشم / الهی ته بلا گردون بواشم
اتّا عمر هاکنم من ته غلامی / اسا بوردی ونه مجنون بواشم
سختی بَکِشیعه مه جان ننا /نکرده راحتی این دار دنیا
مریضی تنِ گوشت ره او هاکرده / چتی نووم جان مار من ته فدا
گل الالهٔ من کجه بوردی / ماه و اِستارهٔ من کجه بوردی
ته که پر بکشی سونه کبوتر / به هر درد چاره من کجه بوردی
کوکو بومبه تسّه سر دمبه صدا / کوه به کوه گردمبه کمبه ونگ وا
مله به مله ره پا زمبه تسّه / شاید مه جان مار بهووه پیدا
کسی سون ته مهربون ندیمه / خجیر و انده خش زبون ندیمه
اتا عمر امسه زحمت بکشی / ته جور عاشق به شه وچون ندیمه
پاپلی بومبه وا گردمبه ته سر / یا بسوزم یا راه بووم تنه ور
اگر بپرسینه چی کاره هسّی / گمبه هسمه جان ماره نوکر
جان مار مه غم درد ره دواعه / جان مار رحمت از سوی خداهه
خدا بشته بهشت ره ته لینگ بن / (صفا) دم زنده که من ته گدامه
دوستان تمام بندها را مثل دوبند بالا بخونن البته گوشواره به دلخواه شما
شاعر قاسم جناتیان قادیکلایی
