اشعار

مگه من ته مار نهیمه
اسا داغدار بهیمه
,,,,,,,, ,,,,, ,,,
ای خدا مه دل دره خون
بدیمه داغ شه جوون
کجه بهیرم ته نشون
غریبی ته عمر بیه توم
مگه من ته مارنهیمه
اسا داغدار بهیمه
,,,,
چنده هاکنم ونگ وا
عکس ره بیرم سر بالا
دیگه بیمه زارو تنها
پسر بمیره ته ننا
مگه ته مار نهیمه
اسا داغدار بهیمه
,,,,,
اسا هر روزه نماشون
توسه امبه قبرستون
دل از داغ ته غرقه خون
ته داغ مه عمر بهیه توم
مگه من ته مار نهیمه
اسا داغدار بهیمه
,,,,
اسا مثال درویشون
پازمبه کوچه خیابون
خنده نزنین رفقون
سخت هسه داغ جوانون
مگه من ته مار نهیمه
اسا داغدار بهیمه
,,,آرزو داشتمه خدا
داماد بوینم شه ریکا
مجمه سر بیتبون فامیلا
توسه هاکردبوم سما
مگه من ته مار نهیمه
اساداغدار بهیمه
,,,
مه پسر بزو دست وپا
ونگ کرده شه جان خدا
آرزو دارنه مه ننا
ونه سرگذشت غم بیّا
مگه من ته مار نهیمه
اسا داغدار بهیمه

.
شاعر قاسم جناتیان قادیکلایی